Shrine News

ಮೇ ಮಹಿನ್ಯಾಚಾ 14 ತಾರಿಕೇರ್ ಆಯ್ತಾರಾ ಸಕಾಳಿಂ 7.30 ವೊರಾರ್ ಫಾತಿಮಾ ಮಾಯೆಚಾ ಪರ್ಬೆಚೊ ಸಂಭ್ರಮ್ ಇಗರ್ಜೆ ‘ಎ’ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ಕಾಣಿಕೊ ಹಾಡುನ್ ಮಿಸಾಚಾ ಅರ್ಗಾಂ ಬಲಿದಾನಾಂತ್ ಭಾಗ್ ಘೆತ್ಲೊ. ಆತ್ಮೀಕ್ ನಿರ್ದೇಶಕ್ ಮಾ. ಬಾ ರೋಮನ್ ಮಸ್ಕರೇನ್ಹಸ್ ಬಾಪಾನಿಂ ಅಪುರ್ಬಾಯೆಚಾ ಪ್ರವಚನಾ ಮಾರಿಫಾತ್ ಮಿಸಾಚೆಂ ಅರ್ಗಾಂ ಬಲಿದಾನ್ ಭೆಟಯ್ಲೆಂ.

ಸಾಂಜೆರ್ 6.00 ವೊರಾರ್ ವಾಡ್ಯಾಂತ್ಲ್ಯಾ ಶ್ರೀ ಆನಿ ಶ್ರೀಮತಿ ಎರಿಕ್ ಸಿಂತಿಯಾ ಪಾವ್ಲಾಚಾ ಘರಾ ಸಂಭ್ರಮಾಚೆಂ ಆಚರಣ್ ಆರಂಭ್ ಕೆಲೆಂ. ತ್ಯಾಚ್ ಘರಾ ಮುಕಾರ್ ಸವೊಚ್ ಬಾಂದಯಿಲ್ಲೊ ಫಾತಿಮಾ ಮಾಯೆಚೊ ಗ್ರೊಟ್ಟೊ ವಿಗಾರ್/ರೆಕ್ಟರ್ ಮಾ. ಬಾ ಅಲ್ಬನ್ ಡಿ’ ಸೋಜಾ ಬಾಪಾನಿಂ ಮಾಗ್ಣ್ಯಾವಿಧಿ ಸವೆಂ ಗ್ರೊಟ್ಟೊ ಆಶೀರ್ವದಿತ್ ಕೆಲೊ. ಜಮ್ಲೆಲ್ಯಾ ಸರ್ವಾಂನಿ ಮಾನಾನ್ ಫಾತಿಮಾ ಮಾಯೆಚೆಂ ಗೀತ್ ಗಾವ್ನ್ ಫುಲಾಂ ಅರ್ಪಿಲಿಂ ಉಪ್ರಾಂತ್ ವೇದಿ ಕಾರ್ಯೆ ಆಸಾ ಕೆಲ್ಲೆಂ.

ಮನೋರಂಜಿತ್ ಕಾರ್ಯಕ್ರಮಾಂತ್ ಲ್ಹಾನಾಂ ಭುಗ್ರ್ಯಾಂನಿ ಸೊಭಿತ್ ರೀತಿನ್ ಸ್ವಾಗತ್ ನಾಚ್ ಕೆಲೊ. ಬಾಸಿಲಿಕಾಚೆ ರೆಕ್ಟರ್ /ಫಿರ್ಗಜೆಚೆ ವಿಗಾರ್ ಮಾ. ಬಾ ಅಲ್ಬನ್ ಡಿ’ ಸೋಜಾ, ಅತ್ಮೀಕ್ ನಿರ್ದೇಶಕ್ ಮಾ. ಬಾ. ರೋಮನ್ ಮಸ್ಕರೇನ್ಹಸ್, ಗೊವ್ಳಿಕ್ ಮಂಡಳೆಚೊ ಉಪಾಧ್ಯಕ್ಷ್ ಶ್ರೀ ಸಂತೋಷ್ ಡಿ’ ಸಿಲ್ವ, ಕಾರ್ಯದರ್ಶಿ ರೊನಾಲ್ಡ್ ನೊರೊನ್ಹಾ ಕೊವೆಂತಾಚೊ ಧರ್ಮಭಯ್ಣ್ ಸಿ. ಸುನೀತಾ ಮೊರಾಸ್, ಸಿ. ಪ್ಲೋರಿನ್ ನಜ್ರೆತ್ ಆನಿ ಹೆರ್ ವಾಡ್ಯಾಚೆ ಸಯ್ರೆ ಜಾವ್ನ್ ಆಯಿಲ್ಲೆ. ಗುರ್ಕಾರ್ ಪ್ರತಿನಿಧಿ ಹಾಂಕಾ ಸರ್ವಾಂಕ್ ವಾಡ್ಯಾಚೊ ಗುರ್ಕಾರ್ ಮಾನೆಸ್ತ್ ಲೋರೆನ್ಸ್ ನೊರೊನ್ಹಾನ್ , ಅಪ್ಲ್ಯಾ ಮೊವಾಳ್ ಕಾಳ್ಜಾಚಾ ಉಮೊಳೊನ್ ಭರೊನ್, ಘನಾಚೊ, ಮಾನಾಚೊ ಮೊಗಾಚೊ ಯೆವ್ಕಾರ್ ಮಾಗ್ಲೊ. ತಶೆಂಚ್ ವಾಡ್ಯಾಂತ್ಲ್ಯಾ ಪ್ರತಿನಿಧಿ, ಪ್ರೇರಕಿ, ಹಾಜರ್ ಜಾಲ್ಲ್ಯಾ ವಾಡ್ಯಾಗಾರಾಂಕ್ ಸರ್ವಾಂಕ್ ಕಾಳ್ಜಾಂ ಥಾವ್ನ್ ಸ್ವಾಗತ್ ಕೆಲೊ. ಹಾಜರ್ ಅಸ್‍ಲ್ಲ್ಯಾ ಸರ್ವ್ ಸೈರ್ಯಾಂಕ್, ವಾಡ್ಯಾಚಿಂ ಆದ್ಲಿಂ ಆನಿ ಆತಾಂಚಿ ಪ್ರತಿನಿಧಿನಿಂ ಸಾಂಗಾತಾ ಮೆಳೊನ್, ಮಾನಾಚೆಂ ಫುಲ್ ದೀವ್ನ್ ಮೊಗಾನ್ ಸ್ವಾಗತ್ ಕೆಲೊ. ಶ್ರೀಮತಿ ಪಾವ್ಲಿನ್ ಕ್ರಾಸ್ತಾನ್ ವಾಡ್ಯಾಚಿ ಮಟ್ವಿ ವರ್ದಿ ವಾಚ್ಲಿ. ಹ್ಯಾ ವರ್ಸಾ ಪಿಯುಸಿಂತ್ ಆನಿ ಧಾವಿ ಕ್ಲಾಸಿಂತ್ ಅತ್ಯಧಿಕ್ ಅಂಕ್ ಜೊಡ್‍ಲ್ಲ್ಯಾ, ಕು. ಫಿಯೊನಾ ಮಾರ್ಟಿಸ್, ಮಾಸ್ಟರ್ ಒಕ್ಸ್‍ಫೊರ್ಡ್ ಡಿ’ ಸಿಲ್ವ ಆನಿ ಕು. ಸ್ಟೇಸಿ ಡಿ’ ಸಿಲ್ವಾಕ್, ವಿಗಾರಾನ್ ಆನಿ ವೇದಿರ್ ಅಸ್‍ಲ್ಲ್ಯಾ ಮಾನಾಚಾ ಸೈರ್ಯಾಂನಿ ಸಾಂಗಾತಾ ಮೆಳೊನ್ ಸನ್ಮಾನ್ ಕೆಲೊ. ಶ್ರೀಮತಿ ಲತಾ ಡಿ’ ಸೋಜಾನ್ ಸನ್ಮಾನಿತಾಂಚಿ ವ್ಹಳಕ್ ದಿಲಿ. ವಾಡ್ಯಾಂತ್ಲ್ಯಾ ಭುಗ್ರ್ಯಾಂನಿ, ಯುವಜಣಾಂನಿ ನಾಚ್ ಸಾಧರ್ ಕೆಲೊ. ಸ್ತ್ರೀಯಾಂನಿ ಸಮುದಾಯೆಚೆಂ ಆ್ಯಕ್ಷನ್ ಸೋಂಗ್ ಮಧುರ್ ತಾಳ್ಯಾನ್ ಗಾಯ್ಲೆಂ. ಅಶೆಂ ಮನೋರಂಜಿತ್ ಕಾರ್ಯ ಮಾರಿಫಾತ್, ಸರ್ವಾಂಚಿ ಕಾಳ್ಜಾಂ ಮಾನಾಂ ಸಂತೊಸಾಂತ್ ಧಾದೊಶಿ ಜಾಲಿಂ. ಶ್ರೀ ವಲೇರಿಯನ್ ಲೋಬೊನ್ ಖೆಳ್ ಚಲವ್ನ್ ವೆಲೆ. ಖೆಳಾಂತ್ ಜಿಕ್‍ಲ್ಲ್ಯಾಂಕ್ ಮಾ. ಬಾ ರೋಮನ್ ಮಸ್ಕರೇನ್ಹಸಾನ್ ಇನಾಮಾಂ ವಾಂಟ್ಲಿಂ. ಉಪಾಧ್ಯಕ್ಷ್ ಶ್ರೀ ಸಂತೋಷ್ ಡಿ’ ಸಿಲ್ವಾನ್ ವಾಡ್ಯಾ ದಿಸಾಚೊ ಮಹತ್ವ್ ಆನಿ ಅನುಭವಾಚೊ ಸಂದೇಶ್ ಪಾಟಯ್ಲೊ. ಮಾ.ಬಾ. ಅಲ್ಬನ್ ಡಿ’ ಸೋಜಾನ್ ವಾಡ್ಯಾಂತ್ ಹರ್ಯೇಕ್ಲ್ಯಾಚಿಯಿ ಮಾಹೆತ್ ಜಾಣಾಂ ಜಾವ್ನ್, ತಾಂಚಿ ಸ್ಥಿತಿಗತಿ ಸಮ್ಜೊನ್, ಮೊಗಾನ್ ಆನಿ ಎಕ್ವಟಾನ್ ಜಿಯೆಂವ್ಕ್ ಉಲೊ ದಿಲೊ.

 ಮಾ. ಬಾ. ರೋಮನ್ ಮಸ್ಕರೇನಾಸಾನ್ ಜೆವ್ಣಾಚೆರ್ ಮಾಗ್ಣೆಂ ಭೆಟಯ್ಲೆಂ. ಶ್ರೀಮತಿ ಮರೀಟಾ ಮತಾಯಸಾನ್, ಕಾರ್ಯೆಂ ಚಲಯ್ಲೆಂ ಶ್ರೀಮತಿ ಲವೀನಾ ಮಾರ್ಟಿಸಾನ್ ಸರ್ವಾಂಚೊ ಉಪ್ಕಾರ್ ಬಾವುಡ್ಲೊ. ಪ್ರತಿನಿಧಿ ಸಿಂತಿಯಾ ಪಾವ್ಲಾನ್, ವಾಡ್ಯಾಗಾರಾಂಚಾ ಸಹಕಾರಾನ್ ಸಗ್ಳಿ ಮಾಂಡಾವಳ್ ಘಾಲ್ಲಿ. ಸಲ್ಡಾನ್ಹಾ ರೆಸ್ಟೋಂರೆಂಟಾಚಾ ಮ್ಹಾಲಕಾನ್ ದಿಲ್ಲೆ “ಗೊಲಿಸೊಡಾ” ಪಿಯೆವ್ನ್ ವಾಡ್ಯಾಗಾರಾಂನಿ ರಾಂದ್‍ಲ್ಲೆಂ ರುಚಿಕ್ ಸಾಂಗಾತ್ಪಣಾಚೆಂ ಜೆವಾಣ್ ಸ್ವೀಕಾರ್ ಕರ್ನ್ ಸರ್ವಾಂ ಧಾದೊಶ ಜಾಲಿಂ.